ആദ്യാക്ഷരിക്ക് ഒരു വയസ്സ്

ദുബായ്
ജൂൺ 1, 2009

പ്രിയപ്പെട്ടവരേ,

‘ആദ്യാക്ഷരി’ എന്ന ഈ ബ്ലോഗ് പിറവിയെടുത്തിട്ട് ഇന്നേക്ക് ഒരു വർഷം പൂർത്തിയാകുന്നു. അതിന് ഏകദേശം ഒരുമാസത്തോളം മുമ്പ് തന്നെ ഡ്രാഫ്റ്റുകളായി ഇതിന്റെ പോസ്റ്റുകൾ തയ്യാറാക്കുവാൻ തുടങ്ങിയെങ്കിലും, 2008 ജൂൺ ഒന്നാം തീയതിയാണ് ആദ്യാക്ഷരിയെ ബൂലോകസമക്ഷം അവതരിപ്പിച്ചത്. അന്നേദിവസം തന്നെ തിരുവനന്തപുരത്തുവച്ച് നടന്ന ‘കേരള ബ്ലോഗ് അക്കാഡമിയുടെ‘ ശില്പശാലയിൽ വച്ച് അങ്കിൾ ഈ ബ്ലോഗിനെ നവാഗത ബ്ലോഗർമാർക്ക് പരിചയപ്പെടുത്തുകയും ചെയ്തു. അതിനുശേഷം ഒട്ടനവധിപേർക്ക് ഇതിലെ വിവരങ്ങൾ മാർഗ്ഗദർശകമായി എന്ന് നാളിതുവരെയുള്ള സൈറ്റ് ട്രാഫിക് ഡേറ്റ സാക്ഷ്യപ്പെടുത്തുന്നു. ഒരു വർഷംകൊണ്ട് അനേകം വായനക്കാർ ഈ ബ്ലോഗിലേക്ക് എത്തുകയും അവർക്ക് ബ്ലോഗ് സംബന്ധമായ സംശയങ്ങൾ തീർത്തുകൊണ്ടിരിക്കുകയും ചെയ്യുന്നു എന്നത് സന്തോഷകരമായ കാര്യമാണ്.

ബ്ലോഗറിൽ ഗൂഗിൾ കൊണ്ടുവരുന്ന പരിഷ്കാരങ്ങൾക്കനുസൃതമായി ഈ ബ്ലോഗിലെ വിവരങ്ങൾ അപ്ഡേറ്റ് ചെയ്യുവാൻ ശ്രമിച്ചിട്ടുണ്ട്. ഇനിയും കുറച്ചൊക്കെ വിവരങ്ങൾ ഇതിൽ വരാതെയുണ്ട് എന്നത് വിസ്മരിക്കുന്നില്ല. എങ്കിലും ബ്ലോഗ് എഴുതുന്നവർക്ക് ഏറ്റവും അത്യാവശ്യമായ വിവരങ്ങളെല്ലാംതന്നെ ഇതിൽ ഉൾക്കൊള്ളിച്ചിട്ടുണ്ട് എന്നാണ് എന്റെ വിശ്വാസം. ബ്ലോഗിന്റെ വലിപ്പക്കൂടുതൽ കാരണം പലർക്കും ഒരു സംശയം എവിടെ നോക്കണം എന്നറിയില്ല എന്ന് എനിക്ക് ചിലപ്പോഴൊക്കെ തോന്നിയിട്ടുണ്ട്. അങ്ങനെയുള്ളവർക്ക് സഹായകമായാണ് ഈ ബ്ലോഗിന്റെ വലതു സൈഡ് ബാറിൽ ഒരു സേർച്ച് ബോക്സ് കൊടുത്തിരിക്കുന്നത്. നിങ്ങൾ അന്വേഷിക്കുന്ന വാക്ക് മലയാളത്തിൽ അവിടെ ടൈപ്പ് ചെയ്യൂ. ആ വാക്ക് ഉൾപ്പെടുന്ന അദ്ധ്യായങ്ങൾ സേർച്ച് റിസൽട്ടായി നിങ്ങൾക്ക് ലഭിക്കും.

ഈ ബ്ലോഗിന് ഇത്രയധികം പ്രചാരമുണ്ടാക്കാൻ സഹായിച്ചത് വായനക്കാരായ നിങ്ങളോരോരുത്തരുമാണ്. ഈ ബ്ലോഗിലേക്ക് ഒരു ലിങ്ക് ആദ്യമായി കൊടുത്തത് അനിൽശ്രീ എന്ന ബ്ലോഗറാണ്. അതിനുശേഷം ഒരുപാട് കൂട്ടുകാർ ആ രീതി പിന്തുടരുകയും, അവരവരുടെ ബ്ലോഗുകളിൽ ഇതിലേക്കുള്ള ലിങ്ക് നൽകുകയും ചെയ്തതുവഴിയാണ് ഇത്രയധികം ആളുകൾക്ക് ഇത് പ്രയോജനകരമായി തീർന്നത്. അതിന് നിങ്ങളോരോരുത്തരോടുമുള്ള നന്ദി ഈ അവസരത്തിൽ ഞാൻ രേഖപ്പെടുത്തുന്നു. മറ്റൊരുബ്ലോഗിൽ നിന്ന് ആദ്യാക്ഷരിയിലേക്കെത്തുന്ന സന്ദർശകരുടെ എണ്ണം നോക്കിയാൽ, ഏറ്റവും കൂടുതൽ ആളുകൾ എത്തുന്നത് ‘കൊടകരപുരാണം’ ബ്ലോഗിൽ നിന്നാണെന്നത് ഇവിടെ പ്രത്യേകം പ്രസ്താവ്യമാണ്. മലയാളത്തിൽ നല്ലൊരു ശതമാനം പുതിയതായിഉണ്ടാകുന്ന ബ്ലോഗെഴുത്തുകാർക്ക് ഒരു പ്രചോദനമായി കൊടകരപുരാണം തീർന്നിരിക്കുന്നു എന്നതിൽ ശ്രീ. സജീവ് എടത്താടന് (വിശാലമനസ്കൻ) തീർച്ചയായും അഭിമാനിക്കാം.

കേരള ബ്ലോഗ് അക്കാഡമി, തങ്ങളുടെ എല്ലാ പുതിയ ശില്പശാലകളിലും ആദ്യാക്ഷരിയെ പരിചയപ്പെടുത്തുന്നുണ്ട്. നവാഗതർക്ക് ഒരു ഓൺ‌ലൈൻ സഹായഹസ്തമായി ഇതിനെ എടുത്തുകാട്ടുന്നുമുണ്ട്. നന്ദി! മലയാ‍ള ബ്ലോഗിംഗ് രംഗത്ത് ലഭ്യമായ സഹായബ്ലോഗുകളിൽ പ്രധാനപ്പെട്ട ഒന്ന് എന്ന നിലയിൽ ഈ ബ്ലോഗിനെ, ബ്ലോഗ് സംബന്ധിയായ പരിപാടികളും കോളങ്ങളും കൈകാര്യംചെയ്യുന്ന പ്രിന്റ് / ദൃശ്യമാധ്യമങ്ങൾ ഒന്നിലേറെത്തവണ ഞാൻ ആവശ്യപ്പെടാതെതന്നെ ഇതുവരെ പരിചയപ്പെടുത്തിക്കഴിഞ്ഞു. അതിന്റെയെല്ലാം പിന്നിൽ പ്രവർത്തിച്ച എല്ലാവർക്കും ഈ അവസരത്തിൽ ഞാൻ നന്ദി രേഖപ്പെടുത്തുന്നു. അതുപോലെ ഈ ബ്ലോഗിൽ വായനക്കാർ ചോദിക്കുന്ന സംശയങ്ങളിൽ എനിക്കറിയാത്തവയ്ക്ക് (പ്രത്യേകിച്ചും ടെക്നിക്കൽ കാര്യങ്ങളിൽ), അപ്പപ്പോൾ മറുപടി തന്ന് സഹായിക്കുന്ന സിബുവിനും, വിശ്വേട്ടനും (വിശ്വപ്രഭ) ഹൃദയപൂർവ്വമായ നന്ദി ഈ അവസരത്തിൽ ഞാൻ രേഖപ്പെടുത്തട്ടെ. രണ്ടുവ്യക്തികൾക്കുകൂടി ഇവിടെ നന്ദി പറയേണ്ടത് അത്യാവശ്യമാണ്. ഒന്ന്, ഈ ബ്ലോഗിന് ആദ്യാക്ഷരി എന്ന പേരു നിർദ്ദേശിച്ച ‘ചന്ദ്രകാന്തം’ ബ്ലോഗിന്റെ ഉടമ ചാന്ദ്നിക്ക്. രണ്ട്, ഈ ബ്ലോഗിന് മനോഹരമായ ലിങ്ക് ബാനർ നിർമ്മിച്ചുതന്ന ‘സിയ’ യ്ക്ക്.

നിങ്ങളുടെയെല്ലാവരുടേയും സഹായസഹകരണങ്ങൾക്ക് ഒരിക്കൽകൂടി നന്ദി പ്രകാശിപ്പിച്ചുകൊണ്ട്

സ്നേഹപൂർവ്വം

അപ്പു



ആദ്യാക്ഷരി ആദ്യ അദ്ധ്യായത്തിലേക്ക്